तडवळे येथील श्री.काळभैरवनाथ-जोगेश्वरी यात्रेस आजपासून प्रारंभ

सह्याद्री निर्भिड न्यूज 

फलटण/ वैभव जगताप 

तडवळे येथील श्री.काळभैरवनाथ-जोगेश्वरी यात्रेस आजपासून प्रारंभ.

सातारा जिल्ह्यातील फलटण तालुक्यातील तडवळे येथे दरवर्षीप्रमाणे जागृत देवस्थान असणाऱ्या श्री काळभैरवनाथ-जोगेश्वरी यात्रा २०२६ मोठ्या उत्साहात साजरी होत आहे. गुरुवार, दि. ९ एप्रिलपासून या धार्मिक आणि सांस्कृतिक महोत्सवाला सुरुवात होत असून विविध कार्यक्रमांचे आयोजन करण्यात आले आहे.

धार्मिक कार्यक्रमांची रूपरेषा

यात्रेची सुरुवात गुरुवार, दि. ९ एप्रिल रोजी दुपारी २ ते ३ या वेळेत होणाऱ्या श्रींच्या हळदी समारंभाने होईल. त्यानंतर शुक्रवार, दि. १० एप्रिल रोजी मुख्य विवाह सोहळ्याचा दिवस असेल. या दिवशी सकाळी ६ वाजता श्रींचा अभिषेक, दुपारी १२ वाजता श्री विठ्ठल प्रासादिक भजनी मंडळ (तडवळे) यांचे भजन आणि दुपारी २ वाजता बाळूभाऊ चव्हाण जागरण गोंधळ पार्टी (बीबी) यांचा गोंधळ सादर होईल. सायंकाळी ५:३५ वाजता श्रींचा भव्य विवाह सोहळा पार पडणार असून संध्याकाळी ६ वाजल्यापासून महाप्रसादाचे आयोजन करण्यात आले आहे.

मंगळवार, दि. १४ एप्रिल रोजी सायंकाळी ५ वाजल्यानंतर श्रींचा छबिना काढण्यात येईल.

मुख्य आकर्षण: १५ एप्रिलचा यात्रा उत्सव

बुधवार, दि. १५ एप्रिल हा यात्रेचा मुख्य दिवस असेल. या दिवशी क्रीडा आणि मनोरंजनाचे बहारदार कार्यक्रम होणार आहेत:

लोकनाट्य तमाशा: सकाळी १० ते दुपारी ४ या वेळेत 'पौर्णिमा पाटील कराडकर' यांचा लोकनाट्य तमाशा मंडळाचा कार्यक्रम होईल.

कुस्त्यांचे जंगी मैदान: दुपारी ५ वाजता भव्य कुस्त्यांचे आयोजन करण्यात आले आहे, ज्यात अनेक नामवंत मल्ल सहभागी होणार आहेत.

सेलिब्रिटी उपस्थिती: टीव्ही स्टार 'कलर्स मराठी ढोलकीच्या तालावर'ची महाविजेती,नेहा पाटील यांची सेलिब्रिटी एन्ट्री हे या यात्रेचे विशेष आकर्षण असेल.

ऑर्केस्ट्रा:रात्री लक्ष्मी प्रोडक्शन प्रस्तुत एकापेक्षा एक अप्सरा'हा बहारदार ऑर्केस्ट्रा सादर होणार आहे.

आयोजक:-श्री काळभैरवनाथ देवस्थान यात्रा कमिटी - २०२६, तडवळे, ता. फलटण.

तडवळे आणि परिसरातील भाविकांनी या सर्व धार्मिक व सांस्कृतिक कार्यक्रमांचा लाभ घ्यावा, असे आवाहन यात्रा कमिटीच्या वतीने करण्यात आले आहे.